..مرايا المجتمع

..اقتباسا أو استكمالا لما جاء في مدونة الأخت عشتو

___________________________________

الأصيل و المو أصيل

نجدي حساوي

عراقي عيمي

كندري فودري

سني شيعي

...............................

!بــــــــــــــــــــــــــــــــــــــــــــــــسسس والله دخنا

!يا ناس احنا بديرة صغيرة وايد ما تتحمل كل هالتفريقات

انزين و بعدين؟؟ مو بالنهاية خرجة بيضة بتلفنا و نندفن تحت الأرض؟؟ كلنا سواسية

مو كلنا نحج مع بعض و نلبس نفس اللبس؟؟ اذا ربنا و دينا يساوينا، احنا منو عشان نفرق نفسنا؟

ليش نرضا على نفسنا نصير نفس الجاهلية الأولى و ربي كرمنا بدين يساوينا و يفضلنا بالعمل الصالح؟

..ادري فجئة صرت دينة.. بس تعالو معاي نحلل مسألة الأصل الي معقدتني

......................................................

دائما أتساءل شنو الفرق بين الأصيل و الي مو أصيل؟

. يجاوبوني الأهل بأن الاصيلين هم الي ما اختلط نسلهم ، أي انهم ما تزاوجوا من السود او من عائلات لا يعرف لهم اصل معين أو أو أو

..أوكي اقتنعت نوعا ما

لكن ما بردت جبدي!! قام يتبادر الى ذهني سؤال ثاني، الان نجد الكثير من العائلات الأصيلة و العريقة تناسبوا مع عائلات مو أصيلة ، هل معناته انهم ما عادو اصيلين؟؟

مثلا، الشيوخ عندنا .. وايد تزاوجوا مع السود و طلع منهم اجيال مختلطة، هل معناته انه اخترب نسلهم و ما عادو أصيلين؟؟

..وفي امثلة كثيرة .. الشاهد من الموضوع انه المسألة نسبية بالنهاية و كل واحد يشوف نفسة اصيل

اكتشفت ان مو بس انا الي عندي هالتساؤلات عندما كنت اتناقش مع شخص عزيز علي و عطاني هذا اللنك

http://www.ansab-online.com/phpBB2/showthread.php?t=7521

عموما هذا الموضوع يطول النقاش فيه و ادري اني ما راح اوصل حق خلاصة متفق عليها.. بس حبيت أشارككم بتساؤلاتي الي اعاني منها أنا و العديد من الفتيات في هذا المجتمع الي بدأ يصير مزعج

الناس وصلت القمر و احنا للحين نسأل عن الأصيل و البيسري

ليش ما نصير كلنا كويتيين و بس؟

مو هذي البلد الي تجمعنا؟؟

!احنا نولدنا و وعينا على الكويت و بس

و هذي الكويت صل على النبي